كنيسة الانبا تكلا هيمانوت الحبشى بالزقازيق


تأثيرات إسلامية و شرقية إمتزجت بحياتنا الاجتماعية و لابد من محوها تماما

اذهب الى الأسفل

تأثيرات إسلامية و شرقية إمتزجت بحياتنا الاجتماعية و لابد من محوها تماما

مُساهمة من طرف بولا وديع في 14/8/2011, 2:56 pm

سلام المسيح له كل المجد
كمسيحين متعايشين وسط مسلمين نتعامل معهم و نحتك بهم فى حياتنا اليومية فكان من المتوقع و الطبيعى ان تمتزج بعض من اعرافهم و معتقداتهم بحياتنا
لكن لابد ان نملك الوعى الكافى لنميز بين الصالح منها و الطالح و ان نمحوا من حياتنا ما يخالف مسيحيتنا

الامثلة :

1-(بعد ما نموت هنروح الجنة)
مافيش حاجة فى المسيحية اسمها جنة بعد الموت (دى كانت ايام ادم و انتهى)
الابرار لهم الفردوس(مكان انتظار) ثم الملكوت بعد المجئ الثانى

2-(كل شيئ قسمة و نصيب و قضاء و قدر و مكتوب)
كل دى_بالمعنى المتعارف عليه فى المجتمع_ مصطلحات اسلامية و لا تمت للمسيحية باى صلة
مافيش اى حاجة اسها قسمة و نصيب و مافيش حاجة اسمها كل مصيبة تحصل نقول قدر علينا... الانسان مخير و هو اللى بيختار حياته و بيتحم نتايج اختياراته سواء خير و لا شر و هذا يتماشى مع عدل الله و مسئولية الانسان عن حياته و قراراته كى لا يكون بلا عذر فى النهاية (و خاصة موضوع الزواج)
و الدليل ان كتاب المقدس بيقول : (ان الله يريد ان جميع الناس يخلصون والى معرفة الحق يقبلون)
و مع ان ارادته واضحة بخلاص الجميع الا ان ده مش بيحصل وكثيرين ضلوا
لان الهنا لا يفرض ارادته علينا و سيحاسب كل واحد على حسب اعماله التى عملها بأرادته الحرة

3-(شرف البنت اهم من شرف الراجل)
يا ويل البنت لو اخطات فى حق شرفها و يكون الموضوع ابسط و مجرد (طيش شباب) لو فعله الرجل !!!!
و كأن طهارة البنت اهم من طهارة الرجل !
او كأن الله هيفرق بين خطية انسان وانسان على حسب نوع الجنس !
الاتنين نفس بشرية متساوية امام الله و كلاهما جسد الله و حاشا ان ناخد جسد الله (سواء رجل او مراة) و نجعلها اعضاء زانية
فياريت بلاش الازدواجية فى التعامل

4-(البنت البور العانس)
المجتمع الشرقى بينظر للبنت اللى تتأخر فى الزواج على انها منتهية الصلاحية و بنظر ليها نظرة شفقة !
بينما مافيش اى مشكلة لما الراجل يتأخر و بيطلقوا عليه "حر او اعذب" مش "عانس او بور"
و طبعا كلمة "بور" ليها حكاية ::: دى مشتقة من اية اسلامية "نسائكم حرث لكم" و بتشبه المرأة بالارض الزراعية (تشبيه غير ادمى) فلما البنت تأخر فى الجواز يقولوا بارت يعنى لم تعد صالحة للزاعة ! ...تشبيه مهين ياريت نبطله
و الكلام ده غلط جدا مافيش اى عيب هى مالهاش ذنب و زيها زى الراجل فياريت الاهل يخفوا شوية من على بناتهم و يرموا الاعراف الغير مسيحية جانبا و يرقوا بتفكيرهم رفقا ببناتنا لان الضغط النفسى عليهم بيؤدى انهم يتجوزا للهرب من نظرة المجتمع و ده نتايجه مصايب !

5-(خلفة الولاد اهم و تفضيل الولاد على البنات او البنت ناقصة عقل)
و ده نتيجة فلسفة الذكورية فى المجتمع الاسلامى و دى طبعا مشكلة ظل الناس فيها لحد فترة كبيرة و ان المولود لو ولد يكون مدلع جدا و لو كل المواليد بنات يكرههم الاب لانه نفسه فى ولد يجى !!!!
رفقا بخليقة الله يا جماعة الله عادل لم يفضل جنس على جنس او يمايز احدهما على الاخر

6-(سياية سى السيد)
انا الراجل و انا اللى كلمتى تمشى !!!
و ضرب البنات و حبسهم (معاملة حيوانية) و اسلوب القهر بالامتيازات الذكورية !
طبعا الرجل الشرقى معروف بالاسلوب ده
رجاءا التخلص منه لانه مش اسلوب حضارى ولا مسيحى و لا مبنى على المحبة
ليس الرجل من دون المراة و لا المراة من دون الرجل

7-(ابعت الرسالة دى لكل اصحابك و الا القديس هيزعل منك !!!)
مافيش الكلام ده اطلاقا فى المسيحية ده هراااااااااء
السيد المسيح حزرنا من تكرار الكلام باطلا كالامم فارحمونا من التخاريف دى !

8-(بعد ما نموت هيقف الانسان و يكون فى كفتين للحسنات و السيئات)
للاسف الكلام ده كتير مسييحين بيرددوه و ده حديث اسلامى و لا علاقة له بالمرة بالمسيحية فلا ميزان و لا كفة و لا حسنات و لا سيئات !!!!

9-(القطة السودة شيطان !!)
طبعا و الكلب الاسود و بردو دى تخاريف تخاريف غير مسيحية فارحمونا فخليقة الله و حيواناته ليست شياطين لمجرد كونا لونها اسود !
ربنا ينير العقول !

10-(الحسد و الحسود و العين و و الكف و العين الزرقا الخ !)
طبعا دى كلام اسلامى بحت و للاسف كتير مننا مازال مؤمن به جدا جدا !!!
فهل ربنا مستنى حسد احدهم ليلحق الضرر بخليقته !
هل الله رهن اشارة الحسودين !
زى مثلا :
متقوليش لحد انك هتتخطبى او انك حامل الا لما الموضوع يتم علشان محدش يديكى عين !!!
المسيحة بتؤمن ان فيه خطية اسمها "الحسد" لكن الخطية دى لا تؤثر ابدا على المحسود لا بالايجاب و لا السلب
و "حسد الشيطان" اللى بنذكره فى صلاة الشكر و نطلب من ربنا يحفظنا منه هو محاربة الشيطان لينا زى ما حسد "ايوب" و حاربه بالضربات كمثال
اما اللى بيصدق الحسد و تأثيره بيخلى نفسه لعبة فى ايد الشيطان يجرب فيه و يساومه حسب قناعاته الغلظ !

11-(الحلال و الحرام)
مافيش حاجة فى المسيحية اسمها حلال و حرام
فيه يليق او لا يليق

12-(الدين المسيحيى و الاديان السماوية)
المسيحية مش دين
المسيحية حياة تتعاش مع رب المجد و لو دورنا فى الكتاب المقدس مش هنلاقى كلمة دين دى نهائيا
و مافيش حاجة اسمها الاديان السماوية و المسيحية لا تعترف لا بالاسلام و نبيه و لا بسماويته

13-(استخدام اليد اليمين فى الاكل و الافعال و ممنوع الشمال !!!)
طبعا ربنا خلقلنا الايدين و لم يجعل احداها جيدة و الاخرى سيئة و جالبة للشيطان !!
طبيعى جدا ان تكون ايمن او ايسر و لا فرق بين اليدين

14-(امتى هيجى المسيح (خ) الدجال !!! )
طبعا معظمنا فاكر ان ده حقيقى !!!!
مافيش حاجة اسمها المسيخ الدجال خالص دى خرافة اسلامية غير مسيحية و غير كتابية بالمرة
يوجد ما يسمى بضد المسيح هو ليس شخص بعينه بل اى شخص لا يعترف بالمسيح ربا و الها

15-(التفائل و التشاؤم )
انا بتفائل بالواد الفلانى
انا بتشائم يالست دى دى عنيها تفلق الحجر !!!!
انا شفت فلان انهاردة ..بس مش هحل حاجة فى الامتحان !!!
يا جماعة ارجوكم
لا يوجد ما يسمى بالانسان ابو وش حلو او الانسان الفقرى اطلاقا هذا يخالف مسيحيتنا
كلنا خليقة الله
و الله يحبنا جميعا لم يخلق احدها محظوظ و الاخر جالب للنحس فهذا لا يستوى مع عدل الله و محبته
ارجوكم لا تهينوا خليقة الله و تتهموها بالنحس !!!

16-(الصويت و التعديد فى المياتم)
ثقافة شرقية بحت !!!
طبيعى اننا نحزن و نبكى
لكن اللى مش طبيعى الصويت و الصراخ و التعديد !
انا اعرف ستات بتحب توجب مع معارفها فى المياتم بالصويت مع انها مكنتش تعرف الميت اصلا !!!
المسيحى المنتقل هو عريس السماء نحزن على فراقه و نفرح لمكانه فى حضن الهنا فلا داعى للافعال الغير حضارية و غير مسيحية

17-(يرحمكم الله بعد العطس !!)
و ده امر اسلامى بحت موجود فى حديث اسلامى و بعيد كل البعد عن المسيحية و غير مذكور اطلاقا فى الكتاب المقدس و مازال الكثير لا يعلم هذا
و طبعا من غير المنطقى ان نطلب الرحمة مخصصا قبل (فعل عضوى) معين فطلب الرحمة من الهنا يكون فى كل وقت

18-(سياسة التكفير و تعبير : "كافر")
تعبير اسلامى بحت لحد دلوقت بسمع كتير مننا بيستخدمه
فلان الفلانى ده كافر ده كفر بالله
الجماعة دول كفار
اللفظ ده لم يستخدم على الاطلاق فى الكتاب المقدس و سياسة التكفير لا تمت للمسيحية بصلة فأرجو ان نبتعد عنها
(و ان وجدت الكلمة فى بعض المدايح القديمة فده نتيجة تاثرهم فى العصر ده بالتعبيرات الاسلامية)

19-(الفرائض...لازم تصوم لازم تصلى و تؤدى فرائض الله !!!)
طبعا مافيش حاجة فى المسيحية اسمها فرائض او لازم تقوم بعمل كذا و الا غضب الله هيحل عليك !!
الصوم و الصلاة هم ذبائح حب لالهنا و ليس اجبار او فرائض او اكراه بالغصب !!!
فارجو التخلص من المفاهيم الاسلامية عن علاقتنا بالله

20-(ليلة الحنة و عادتها)
ليه الحنة
و ما ادراك بليلة الحنة و ما بها من عادات و تصرفات لا تمت للمسيحية باى صلة
بدل ما نصلى ربنا يبارك فى الزواج نعمل حنة !!!!!
و طبعا الحنة دى عادة متخلفة غير مسيحية مافيش اى فايدة ليها على الاطلاق فارجو قبل ما نعمل حاجة لازم تكون ليها هدف علشان منكونش عشوائيين و منقادين لعادات بلا اى معنى


21-(الكلاب و الحمير بتشوف الشياطين)
كتير لما نسمع صوت كلب بيهوهو او حمار بينهق افوجأ ان شخص مسيحيى يقولى "لانهم بيشوفوا الشيطان !!! " و هاتك يا خرافات ان الديك بيشوف الملايكة و الخ الخ
طبعا الكلام ده اسلامى بحت و لا اساس له من الصحة و لا صدى له فى الكتاب المقدس طبعا
الحيوانات دى زيها زى باقى الحيوانات مش لمجرد انها اصدرت صوت يبئى فى حاجة غير مرئية يعنى !

و فى اشاعة تانية اسلامية ان ربنا بيكره صوت الحمار و ان ده اوحش صوت الخ الخ مش عايزين ندى الكلام ده اكتر من حقه
و ده كلام فاضى طبعا
ياريت نتخلص من الافكار دى انها بعيد عن مسيحيتنا و بعيد عن العقل كمان !

22-(النصرانية و النصارى)
[size=12]ده التعبير الاسلامى لوصف المسحيين[/size]
بعضنا بيفتكر انه ده احد اسمائنا و انه عادى
لكن ده مش اسم ده وصف و بيعتبر اهانة لينا و احنا مش بنقبله كأسم
و بيرجع اصله (قبل اقتباس و تحريف الاسلام له) لزمن الرسل لما كان اليهود بيطلقوا علينا "ناصريين" كنوع من انواع الاهانة لان "الناصرة" لم يكن يخرج منها شيئا صالحا
و ان وجد فى بعض المدايح و الكتب المسيحية (المترجمة فى زمن تأثرها بالاسلاميات) فده ايضا تأثرا بالاعراف الاسلامية و حاليا تم تصحيح الكلمات الخاطئة فى الطبعات الجديدة فى كتب مدايح_تسبحة كيهك مثلا




23-(الشيطان مخلوق من نار)
ده الفكر الاسلامى عن الشيطان و للاسف بردو اثر فى بعضنا
الشيطان فى المسيحية لم يخلق على حاله لان الله لا يخلق شيئا شريرا بذاته
بل كان ملاك ثم سقط لتعاليه و غروره
و هو روح و غير مخلوق من نار او من مادة محسوسة

24-(الجن)
من كتر ما بنسمعها فى التلفزيون و من التأثر بالمسلمين اعتقد البعض ان الجن حقيقة !!!
ده جنس اسلامى تالت غير البشر و الشياطين و لا وجود له من الاساس
و ان وجد فى الكتاب المقدس فى العهد القديم كملة "جن" او "جان" فهى ترجمة ليست دقيقة لكلمة "شيطان" و فى الترجمات الاصلية هى "شيطان"

25-(اعوذ بالله من الشيطان الرجيم و المصطلحات الاسلامية اليومية)
الشيطان الرجيم دى لها قصة خرافية اسلامية و ملناش علاقة بيها
و كثير من المسيحيين للاسف استبدلوا صلاوتنا السهمية بالمصطلحات الاسلامية مثل : اعوذ بالله منك , استغفر الله العظيم , لا حول و لا قوة الا بالله ...الخ الخ
احنا لينا مسيحيتنا و اسلوبنا و صلواتنا فأرجو ان نتمسك بيها مثل : يا ربى يسوع المسيح ارحمنى ,اعنى,قوينى, و لما نتفزع او نتخض : بسم الصليب ...الخ الخ

26-(مولد القديس الفلانى)
الموالد و ما ادراك ما الموالد
انهاردة مولد الست دماينة
انهاردة مولد مارمينا
و يتحول الدير او المكان الى نزهة و تخييم و اكل و العاب و انوار و بخت و بندقية و صيد كأننا فى شم النسيم
طبعا اصطلاح "الموالد" ده تبع الاولياء الصالحين مولد سيدى العريان و مولد المرسى ابو العباس
القديسين لا يحتفلوا بعيد ميلادهم لان الانسان بيولد فى خطاياه "بالخطايا ولدتنى امى"
الاحتفال بيكون ب "تذكار استشهاد القديس" "عيد تكريس كنيسة" "تذكيار نياحة القديس" او حتى "عيد تعميده (الميلاد الثانى)" و هدفه تطويبهم و النظر الى نهاية سيرتهم و التمثل بأيمانهم مش التخييم و اللعب و النزهة !!!!

و جارى اضافة المزيد كلما تذكرت او كلما ذكرنى احد الاخوة

ارجو ان نتخلص قطعيا من تلك الاعراف و العادات و الموروثات التى لا تمت لمسيحيتنا بصلة


وَلاَ تُشَاكِلُوا هذَا الدَّهْرَ، بَلْ تَغَيَّرُوا عَنْ شَكْلِكُمْ بِتَجْدِيدِ أَذْهَانِكُمْ، لِتَخْتَبِرُوا مَا هِيَ إِرَادَةُ اللهِ: الصَّالِحَةُ الْمَرْضِيَّةُ الْكَامِلَةُ (رو 12 : 2)



avatar
بولا وديع

النوع : ذكر
نوع المتصفح: :
الجنسية :
المهنة :
الهوايات :
تاريخ التسجيل : 02/09/2009
العمر : 32
المشاركات : 3225
معدل تقييم المستوى : 26
بمعدل : 7386
تاريخ الميلاد : 19/01/1986
الكنيسة او الابراشية : : البطل مارجرجس عين شمس

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: تأثيرات إسلامية و شرقية إمتزجت بحياتنا الاجتماعية و لابد من محوها تماما

مُساهمة من طرف AL MALEKA HELANA في 2/1/2013, 1:35 pm

شكرا ربنا يبارك عمل محبتكم فى المنتدى



avatar
AL MALEKA HELANA

النوع : انثى
نوع المتصفح: :
الجنسية :
المهنة :
الهوايات :
تاريخ التسجيل : 09/10/2012
المشاركات : 152
معدل تقييم المستوى : 0
بمعدل : 174

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى