طماع وحرامى . . . .

طماع وحرامى - 1

قالت شهرزاد :

بلغنى أيها الملك العظيم .. ذو الفكر القويم .. والعقل السليم .. ان لعبد المتعال بطل الإقصوصة .. ذو النفس المعلوله المنقوصة .. أخوين يكبراه سنآ .. ويفوقاه أدبآ وعلمآ .. فلا يعقل أنهم إخوة فعلآ .. وكان أبيهم مريضآ بعقله .. لذا أغلقوا عليه داره .. فلو علم الناس ما احتملوا عاره .. وبعد وقت وافته المنية .. ولأنه كان من الناس الغنية .. ترك مالآ مش شوية ..
وبعد .. فوجئ الجميع بأمر فظيع .. تسبب بالفوضى بين القطيع ..
فقد ادعى عبد المتعال بإمتلاكه لكل المال .. بصك من أبيه دون بقية العيال ..
وبعد راحة الإخوة وهدوء البال .. وأملهم فى تغيير الحال .. فوجئوا بالخبر .. وبعضهم ما صبر .. وأوشك ان يقع بينهم النزال .. والحرب والقتال .. ويحك أيها المحتال ..

++++

الخادمة تحادث زوجها :
الخادمه : المنيل سيدى ده ما بيخافش ؟ ده ممكن واحد من اخواته ييجى يضربه طلقتين يجيب اجله .. امال إيه ؟ الغيظ وحش
زوجها : انا لو منهم أعملها .. بس بطلقة واحدة .. التانيه خسارة فى جتته
- الرجالة ستروا أبوهم ومحدش عرف بعلته .. ومات مكرم .. وكلهم عارفين ان عقله مفوت ولا يمكن يكتب لحد بيع وشرا .. وأن ده لا يجوز للمجنون .. وببساطة ممكن يطعنوا فى الورق انه مزور .. ويودوه فى داهيه
- بس من شهامتهم .. مش عايزين اللى ستروه عايش .. يفضحوه ميت .. لكن الخسيس خسيس .. سيدك ده ربنا ينتقم منه .. بيسرق الميت .. ويخسر الحي .. ربنا موجود .. ينتقم منه ..

++++

منزل عبد المتعال .. هو يكلم زوجته : بصى .. هما جايين دلوقتى .. تقعدى متفتحيش بقك .. لا بآه ولا بلأ .. وإوعى يستغلوا عبطك ويحننوا قلبك ..
زوجته : انت إزاي قلبك يطاوعك تعمل كده ؟
- إيه ؟ حقى .. ومن حكم فى ماله ما ظلم
- مالك منين ؟ انت فاكر ان كدبتك دى مش مفضوحه ؟ ده ابوك الله يرحمه كان غير مسؤول عن تصرفاته
- ماحجروش عليه ليه ؟ القانون لا يحمى المغفلين ..
- بس ربنا بيحمى الطيبين .. الحنينين .. اللى بيراعوا ربنا .. القديسين ..
- دول عجزة ومكسحين .. وعلى اخد حقهم مش قادرين .. ويورونى هيعملوا إيه .. انا معايا ورق قانونى ومتسجل فى الشهر العقارى
- إمتى وإزاي ؟ المرحوم مكانش بيخرج من البيت .. انت عارف ؟ هما قادرين عليك .. بس مش قادرين على قلبهم .. انت مش مراعى حق الأحياء .. وهم مراعين احساس عظم التربة
يسمع صوت من الخارج .. فينهى عبد المتعال الحوار قائلآ : بس .. بس .. أهم جم .. سيبينى بقى أأقسم وأتكتك

++++

الخادمة : اتفضلوا .. سيدى أهه
عبد المتعال : أهلآ .. أهلآ .. إخواتى حبايبى .. ريحة المرحوم الله يرحمه .. " تأثير مصطنع " دلوقتى ملناش غير بعض " يبكى ، بكاء مصطنع طبعآ " .. انتو اللى لي يا اخواتى .. يا حبايبى
أخ-1 : حلو اللسان .. قليل الإحسان ..
- يعنى إيه ؟
- يعنى فين حقنا يا عبد المتعال ؟
- لآ ..لآ .. لآ.. كله إلا كده يا اخويا .. انت بتتهمنى انى حرامى ؟ ليه كده ؟
- أخ-2 : بذمتك انت مصدق نفسك ؟ .. والا انت فاكرنا عبايط ؟
- عبايط إيه يا اخويا لا سمح الله ؟
- أخ-1 : انت طبعآ عارف ان احنا ممكن نطعن فى الكلام ده فى المحكمة .. ونثبت مرض ابوك خاصة ان فى دكتور مشهور كان بيعالجة فى البيت .. وممكن يشهد معانا
- مانا عارف وعامل حسابى لليوم ده كويس .. يعنى جاهز بأوراقى
- أخ-2 : ياه! للدرجآدى! وتفضح ابوك الى سترناه السنين دى كلها ؟ يا اخى دى لو فلوسك لوحدك بجد .. وانت عارف حالتنا .. وظروف عيالنا .. خصوصآ وانت حالتك مستوره ولوحدك المفروض تمد ايدك وتساعدنا .. ده احنا اخوات
- ايوة .. وصلنا بقى للشحاته
- أخ-2 : شحاته ؟؟؟ هي وصلت لكده ؟ ربنا عالم انا ماسك نفسى أد إيه .. لكن لو قررت آخد حقى منك ,, ولو دست على ضميرى من ناحية ابويا .. ومن جهتك برضه .. ما انت برضه اخويا .. ساعتها هأقطع حق بناتى ولو طلع على جتتك لحم
- أخ-1 : إيه رأيك انتى يا مرات أخويا ؟ " صمت " ماتردى يا مرات اخويا
" تبدأ الزوجة بالبكاء "
- كلكو حنينين يعنى .. بتبكى علينا حضرتك ؟
- لا .. ببكى عليه هو .. هايقف قدام ربنا شايل كتير
عبد المتعال لزوجته " بعنف " : إطلعى فوق .. " صارخآ " اطلعى فوق ..
ثم لإخوته : كفايه لحد كده .. انا استحملتكم كتير .. اتفضلوا روحوا
أخ-2 : بتطردنا يا ابن والدى ؟ شكرآ .. ربنا موجود .. سلام
أخ-1 : نصيحة ، لو مطمئن للدنيا ! خاف من ربنا .. اللى هو كله عدل

++++


منزل الأخ-1 .. وقد عاد وكانت زوجته فى انتظاره لتعلم ماذا فعل
الزوجه : ها
الزوج : ما هاهش
- يعنى إيه ؟
- ما يعنيش .. سيبينى فى حالى
- إيه الكلام ده .. ما تفهمنى خدت حقك ولا لا ؟
- للأسف نشف دماغه .. وبرضه متمسك بكدبته ومصمم يسرقنا
- وانت هتعمل إيه ؟
- يعنى هعمل إيه
- يا سلام .. انت عارف أي راجل كان هيعمل إيه
- " غاضبآ " ما انا مش راجل .. مش راجل يا ام عيالى .. مش راجل .. عايزانى أعمل إيه ؟ أقتل أخويا ؟ ولا عايزانى أقف فى المحكمه واعرى الميت من توبه .. واورى الناس عار خبيناه سنين .. يا شيخه دى المحبة ستارة .. وابويا ياما سترنا وياما قدم خير .. تكون دى جزاته ؟ ارحمنا يا رب .. ارحمنا يا رب " يقولها وهو يخرج "
- لا .. ما هو انا مش هسكت .. ده انا لو اضربت على قفايا تجينى نقطه واموت فيها .. بس هعمل ايه .. تعملى ايه يا بت .. تعملى ايه .. ايوه .. انا هروح للمغفلة التانيه مرات المغفل التانى .. أشوفها عملت ايه مع المنيل جوزها .. ونشوف هنتصرف إزاي
راحت لسلفتها ، وبعد المناقشات الحاده اتفقوا على تدبير لقاء مع زوجة عبد المتعال لمناقشة الأمر

++++

اجتماع الزوجات الثلاث ..
زوجة عبد المتعال = زع .. زوجة الأخ-1 = ز-1 .. زوجة الأخ-2 = ز-2
زع : قبل اي كلام .. انتو عارفين انى معاكم .. أكيد اجوازكم قالولكم انا بكيت عليه أد إيه
ز-1 : عشان كده جينالك .. تفتكرى نعمل إيه .. نسيب حقنا
ز-2 : والا فى حل ؟
زع : لازم نفكر بهدوء وعقلانيه فى حل يخليه يرد الحق لصحابه
1- : هي التركه تقدر بكام ؟
2- : كلها على بعضها
ع : تقريبآ .. اتنين مليون كاش .. والمصنع بحوالى مليون
2- : انا عندى اقتراح
ع : سمعينا
2- : احنا نخبيك فى حته .. وحد يكلمه انك مخطوفه .. ومطلوب فديه اتنين مليون جنيه
ع : ها ها ها
1- : بتضحكى ليه؟
ع : هو ده بيهمه ؟ وبعدين هو عارف انى متعاطفه معاكم .. وعلى طول هيفكر انكم متفقين معايا
2- : طب وبعدين ؟
ع : انتو ليه مكلمتوش عمه فطين .. ده عمه وعم اجوازكم .. ويمكن يقدر عليه
1- : هو احنا نعرف له عنوان .. ده هاجر من مصر من عشرين سنه .. وقبل ما نتجوز ولاد اخوه
2- : وكل اللى سمعناه عنه هو اسمه .. وانه عايش فى نيوزيلانده
ع : انا معايا رقم تليفونه
2- : وساكته ؟
1- : الحقينا بيه .. يا رب افرجها علينا
2- : ايوه .. ده احنا ورانا عيال
ع : الرقم اهه .. بس خليكم على اتصال
2- : هو جوزك مبلغهوش بوفاة اخوه ؟
ع : اتصل بيه .. قالو له انه مسافر استراليا فى رحلة استجمام وطالب ان محدش يزعجه .. فطلب منهم يبلغوه الخبر بمجرد عودته
1- : ربنا يستر

++++